លោក ឈុន សុភមង្គល ប្រធានសាខាគយខេត្តឧត្តរមានជ័យ ប្រព្រឹត្តអំពើពុករលួយយ៉ាងពេញបន្ទុក មិនអាចបិទបាំងបានទេ
កណ្តាល, ថ្ងៃទី ០១ ខែធ្នូ ឆ្នាំ២០២០
ដោយ៖ លោក ថៃ ប៊ុនរិទ្ធ
សេចក្តីរាយការណ៍ពីមន្ត្រីគយនៅក្នុងអង្គភាពសាខាគយខេត្តឧត្តរមានជ័យ បានបង្ហើបឲ្យដឹងថា បច្ចុប្បន្នលោក ឈុន សុភមង្គល ប្រធានសាខាគយខេត្តឧត្តរមានជ័យ យកជំនាញខាងពុករលួយកាលនៅធ្វើជាមេគយខេត្តបាត់ដំបង មកអនុវត្តន៍ក្នុងខេត្តឧត្តរមានជ័យ យ៉ាងពេញទំហឹងគ្មានញញើតអ្វីទាំងអស់។
ប្រភពបានឲ្យដឹងទៀតថា ការដែលលោក ឈុន សុភមង្គល ប្រធានសាខាគយខេត្តឧត្តរមានជ័យ ហ៊ានធ្វើអ្វីៗតាមអំពើចិត្តគឺដោយសារអាងមានខ្នងបង្អែករឹងមាំនៅក្នុងក្រសួងហិរញ្ញវត្ថុ ក៏ដូចជានៅក្នុងអគ្គនាយកដ្ឋានគយនិងរដ្ឋាករកម្ពុជា។ ជាក់ស្តែងលោក គុណ ញឹម អគ្គនាយកគយ បានរក្សាភាពស្ងៀមស្ងាត់ក្នុងខណៈដែលរឿងអាស្រូវពុករលួយច្រើនបែបច្រើនយ៉ាងរបស់លោក ឈុន សុភមង្គល ប្រធានសាខាគយខេត្តឧត្តរមានជ័យ ត្រូវបានបើកកកាយជាបន្តបន្ទាប់។
តាមការបង្ហើបពីមន្ត្រីពាក់ព័ន្ធនៅច្រកអន្តរជាតិអូរស្មាច់ បានឲ្យដឹងថា បច្ចុប្បន្នលោក វ៉ាន់ ក្តេ ប្រធានការិយាល័យគយច្រកអូរស្មាច់ ឃុបឃិតឲ្យឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់យ៉ាងពេញបន្ទុកដើម្បីផលប្រយោជន៍ផ្ទាល់ខ្លួន។
សូម្បីតែជ្រូករស់មាន់រស់ក៏លោក វ៉ាន់ ក្តេ ប្រធានការិយាល័យគយច្រកអូរស្មាច់ បើកដៃឲ្យក្រុមហ៊ុននិងឈ្មួញមួយចំនួននាំចូលយ៉ាងពេញបន្ទុកដែរព្រោះអាងមានលោក ឈុន សុភមង្គល ប្រធានសាខាគយខេត្តឧត្តរមានជ័យ ជាបង្អែករដ៏រឹងមាំ។ ប្រសិនបើគ្មានលោក ឈុន សុភមង្គល ប្រធានសាខាគយខេត្តឧត្តរមានជ័យ ជាបង្អែកទេនោះ គឺលោក វ៉ាន់ ក្តេ ប្រធានការិយាល័យគយច្រកអូរស្មាច់ មិនហ៊ានឃុបឃិតឲ្យឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់ ទំនិញខុសច្បាប់ ជ្រូករស់មាន់រស់តាមច្រកអូរស្មាច់ ស្រេចតែអំពើចិត្តឡើយ។
ចំណែកមន្ត្រីពាក់ព័ន្ធនៅច្រកទ្វារអន្តរជាតិជាតិជាំ ស្រុកអន្លង់វែង ខេត្តឧត្តរមានជ័យ បានឲ្យដឹងថា បច្ចុប្បន្នលោក កែវ សារ៉ាត់ ប្រធានការិយាល័យគយច្រកទ្វារអន្តរជាតិជាំ បើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់យ៉ាងគំហុកដោយសារអាងមានលោក ឈុន សុភមង្គល ប្រធានសាខាគយខេត្តឧត្តរមានជ័យ ជាបង្អែក។ លើសនេះទៅទៀតលោក កែវ សារ៉ាត់ ប្រធានការិយាល័យគយច្រកទ្វារអន្តរជាតិជាំ ឃុបឃិតជាមួយសមត្ថកិច្ចពាក់ព័ន្ធដទៃទៀតបើកដៃឲ្យឈ្មួញមួយចំនួនដឹកជញ្ជូនឈើ ធ្យូង វល្លិ៍ផ្តៅ និងជ័រទឹក ចេញទៅស្រុកសៀម យ៉ាងរលូន។ ដូច្នេះលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរបណ្តែតបណ្តោយតទៅទៀតទេ ព្រោះលោក គុណ ញឹម អគ្គនាយកគយ នៅតែបើកដៃឲ្យលោក ឈុន សុភមង្គល ប្រធានសាខាគយខេត្តឧត្តរមានជ័យ ព្រមទាំងមន្ត្រីក្រោមឱវាទប្រព្រឹត្តអំពើពុករលួយយ៉ាងពេញទំហឹង៕
