កណ្តាល, ថ្ងៃទី០១ ខែធ្នូ ឆ្នាំ២០២០ដោយ៖ លោក ថៃ ប៊ុនរិទ្ធ សេចក្តីរាយការណ៍ពីប្រជាពលរដ្ឋក្នុងសង្កាត់ស្វាយប៉ោ ក្រុងបាត់ដំបង ខេត្តបាត់ដំបង បានអំពាវនាវឲ្យថ្នាក់ដឹកនាំក្រសួងមហាផ្ទៃនិងនាយឧត្តមសេនីយ៍ នេត សាវឿន អគ្គស្នងការនគរបាលជាតិចាត់វិធានការបង្ក្រាបល្បែងស៊ីសងច្រើនប្រភេទដែលកើតឡើងយ៉ាងរាលដាលក្នុងមូលដ្ឋានពួកគាត់ជាបន្ទាន់។ ដោយហេតុថា បច្ចុប្បន្ននេះល្បែងឡូតូចាក់លុយតាមប្រព័ន្ធអ៊ីនធឺណេតត្រូវគេបើកលេងយ៉ាងពេញបន្ទុកហើយមន្ត្រីអាជ្ញាធរនិងសមត្ថកិច្ចមូលដ្ឋានក្នុងក្រុងបាត់ដំបង មិនចាត់វិធានការបង្ក្រាបនៅឡើយទេ។ ជាងនេះទៅទៀតលោក សាត គឹមសាន ស្នងការនគរបាលខេត្តបាត់ដំបង និងលោក ងួន រតនៈ អភិបាលខេត្តបាត់ដំបង បានរក្សាភាពស្ងៀមស្ងាត់ក្នុងខណៈដែលល្បែងស៊ីសងកើតឡើងយ៉ាងពេញបន្ទុក។តាមការអះអាងរបស់ប្រជាពលរដ្ឋក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង បានឲ្យដឹងថា នៅខាងមុខសាលាសុវណ្ណភូមិ មានទីតាំងល្បែងស៊ីសងតាមប្រព័ន្ធអ៊ីនធឺណេតមួយកន្លែងកំពុងដំណើរការយ៉ាងរលូនហើយមានអ្នកចូលរួមលេងយ៉ាងគគ្រឹកគគ្រេង។ ប្រជាពលរដ្ឋសង្ស័យថា នាយប៉ុស្តិ៍នគរបាលរដ្ឋបាលសង្កាត់ស្វាយប៉ោ និងលោក ឆាង វណ្ណឆៃ អធិការនគរបាលក្រុងបាត់ដំបង ទទួលបានផលប្រយោជន៍ពីអ្នកបើកល្បែងស៊ីសងខុសច្បាប់ទើបមិនចាត់វិធានការបង្ក្រាប។ ប្រការនេះកំពុងធ្វើឲ្យប្រជាពលរដ្ឋព្រួយបារម្ភយ៉ាងខ្លាំងពីបញ្ហាអសន្តិសុខសង្គមព្រោះនៅពេលល្បែងស៊ីសងកើតឡើងយ៉ាងរាលដាលគឺអំពើចោរកម្ម និងបទល្មើសផ្សេងៗក៏កើតឡើងយ៉ាងពេញបន្ទុកផងដែរ។មានការកត់សម្គាល់ថា ចាប់តាំងពីលោក សាត គឹមសាន ទទួលបានតំណែងជាស្នងការនគរបាលខេត្តបាត់ដំបង ជំនួសលោក អ៊ុច សុខុន រួចមកគឺល្បែងស៊ីសងក្នុងសង្កាត់ស្វាយប៉ោ និងសង្កាត់អូរចារ កើតឡើងច្រើនជាងមុនទៅទៀត។ ដូច្នេះហើយទើបប្រជាពលរដ្ឋអំពាវនាវឲ្យថ្នាក់ដឹកនាំក្រសួងមហាផ្ទៃក៏ដូចជានាយឧត្តមសេនីយ៍ នេត សាវឿន អគ្គស្នងការនគរបាលជាតិ ពិនិត្យទៅលើភាពអសកម្មរបស់លោក ងួន រតនៈ អភិបាលខេត្តបាត់ដំបង ក៏ដូចជាលោក សាត គឹមសាន ស្នងការនគរបាលខេត្តបាត់ដំបង ជាបន្ទាន់។ ដោយហេតុថា រយៈពេលប្រមាណ១ខែចុងក្រោយនេះល្បែងស៊ីសងកើតឡើងពេញបន្ទុកក្នុងក្រុងបាត់ដំបងហើយលោក សាត គឹមសាន ស្នងការនគរបាលខេត្តបាត់ដំបង និងលោក ងួន រតនៈ អភិបាលខេត្តបាត់ដំបង មិនទាន់ចាត់វិធានការទប់ស្កាត់នៅឡើយទេ៕
ព័ត៌មានគួរចាប់អារម្មណ៍
ចាប់ឃាត់ខ្លួនជនសង្ស័យ១នាក់ ពាក់ពន្ឋ័ករណីលួច (ខ្មែរថ្ងៃនេះ)
កាំកុងត្រូលខេត្តកណ្ដាល ចុះត្រួតពិនិត្យទំនិញហួសកាលបរិច្ឆេទ និងខូចគុណភាព ដាក់លក់នៅផ្សាររកាកោង (ខ្មែរថ្ងៃនេះ)
រដ្ឋបាលខេត្តស្ទឹងត្រែង បើកវេទិការផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត សម្រាប់អាណត្តិទី៣ ឆ្នាំ២០១៩ នៅក្នុងស្រុកសៀមប៉ាង (ខ្មែរថ្ងៃនេះ)
ចាប់ឃាត់ខ្លួនជនសង្ស័យម្នាក់ ពាក់ព័ន្ធករណីគ្រឿងញៀន (ខ្មែរថ្ងៃនេះ)
ឃាត់ខ្លួនប៉ូលីសក្លែងក្លាយ ពាក់ឯកសណ្ឋានស័ក្តិ៣ ធ្វើសកម្មភាពឆែកឆេរសម្ភារៈ និងគំរាមពិនិត្យទឹកនោមរកសារធាតុញៀន ទៅលើយុវជនម្នាក់ នៅភ្នំពេញ (ខ្មែរថ្ងៃនេះ)
វីដែអូ